Noticias

  • A Xunta de Galicia prolongará ata finais de 2020 a súa axuda extraordinaria aos beneficiarios do Bono de Alugueiro Social de tal xeito que non teñan que aboar nada pola renda da súa vivenda durante o que resta de ano. Esta medida, en virtude da cal o Goberno autonómico asume o 100% do custo do alugueiro, fíxose efectiva por primeira vez no mes de abril e volveu repetirse en maio. O Diario Oficial de Galicia publica hoxe a Resolución pola que se resolve a concesión directa da axuda complementaria á dos programas do bono de alugueiro social e do bono de alugueiro social destinado ao alugamento de vivendas para as vítimas de violencia de xénero.
  • O Comité de Expertos Económicos de Galicia, en cuxa reunión participou o presidente da Xunta, Alberto Núñez Feijóo, aposta por impulsar novas medidas para facilitar o financiamento das empresas no actual contexto económico a causa do COVID-19, reforzando a solvencia das compañías e o seu crecemento a través de diferentes instrumentos financeiros. Segundo se avaliou no encontro, o papel da Administración debe ser especialmente activo para apoiar os procesos de adaptación dos actores económicos, promovendo instrumentos flexibles e que permitan captar fondos que lles aseguren capacidade suficiente para levalos a cabo. Tamén se fixo fincapé en que é estratéxico fortalecer o tamaño do tecido empresarial.
  • Tras as xestións realizadas polo Goberno galego, os establecementos comerciais poden realizar rebaixas e promocións se garanten que non se producen aglomeracións e que se cumpre coas perceptivas medidas de seguridade. Esta aclaración do Goberno prodúcese despois de que o presidente da Xunta, Alberto Núñez Feijóo, trasladara o pasado domingo, na videoconferencia co presidente do Goberno e outros presidentes autonómicos, as diferentes inquedanzas do comercio galego en relación á Orde SND/399/2020, publicada o sábado 9 de maio no Boletín Oficial do Estado, e que regula a actividade do sector nesta fase 1.
  • A conselleira de Política Social, Fabiola García, denunciou hoxe no Parlamento autonómico que o Goberno central volve discriminar a Galicia na asignación dos fondos sociais do 0,7% do Imposto sobre a Renda das Persoas Físicas (IRPF). Fabiola García lembrou que o ano pasado, o Executivo estatal recoñeceu que Andalucía, Asturias, Baleares, Canarias, Cantabria, Castela-A Mancha, a Comunidade Valenciana, Estremadura e Galicia estaban a recibir menos cartos dos que lles correspondía da asignación destes fondos. Na proposta de reparto presentada para este ano, Galicia é a única das nove comunidades que actualiza os seus fondos un 0,9%, o correspondente á inflación, fronte ao 15,2% de media que recibirán o resto.
  • A secretaria xeral de Emprego, Covadonga Toca, informou hoxe dos datos do paro do mes de abril, unhas estatísticas marcadas pola parálise da actividade económica derivada da crise sanitaria do Covid-19 e que está repercutindo no mercado laboral galego. Toca explicou que a pesar de que a Comunidade encadeaba seis anos consecutivos de caída do paro interanual nun mes de abril e descensos intermensuais desde o 2013, estas series positivas vense alteradas pola situación actual.
  • O conselleiro de Facenda, Valeriano Martínez, trasladou hoxe ao Ministerio de Facenda que Galicia non comparte os criterios de reparto dos fondos adicionais anunciados polo Goberno para afrontar a crise do COVID-19, dado que se afastan dos criterios vixentes no sistema de financiamento autonómico. Nunha videoconferencia na que participaron representantes das comunidades autónomas e do Ministerio de Facenda, o ministerio trasladou que os fondos adicionais serán de 16.000 millóns de euros e aprobaranse a través dun real decreto-lei coa seguinte distribución: 10.000 millóns para gasto sanitario, 1.000 millóns para gasto social e 5.000 millóns para compensar o descenso de recadación nos tributos propios.
  • O Comité de Expertos Económicos de Galicia, en cuxa reunión participou hoxe o presidente da Xunta, concluíu a necesidade de que o Goberno desvincule o expediente de regulación temporal de emprego (ERTE) de forza maior do mantemento do actual estado de alarma. Tal e como apuntou o conselleiro de Economía, Emprego e Industria despois da xuntanza, esta medida é necesaria para “dotar de seguridade xurídica e certeza aos propios empresarios e autónomos”. A criterio dos expertos, o que debe ser habilitante para a utilización deste instrumento é o impacto sobre o nivel de actividade das empresas derivado das medidas de distanciamento social, limitacións de afluencia ou de períodos de apertura ou calquera outra restrición para o desenvolvemento da súa actividade.
  • A Xunta de Galicia e o comercio galego traballan xuntos nun protocolo para a reapertura e nas novas medidas para favorecer a reactivación económica dun sector estratéxico. O titular do Executivo autonómico, Alberto Núñez Feijóo, mantivo onte unha reunión a través de videoconferencia con representantes do comercio galego, na que tamén estivo presente o conselleiro de Economía, Emprego e Industria, Francisco Conde. Na mesma, constatouse a necesidade de que o Goberno central estableza unhas directrices claras para que o sector poida reabrir con garantías, despois das dúbidas xeradas tras a presentación do plan de desescalada o pasado martes. Por iso, a Xunta e o comercio galego xa están a traballar nun protocolo propio para a reapertura, e nun protocolo específico para perruquerías.
  • Os ingresos tributarios da Comunidade Autónoma no exercicio 2019 situáronse en 6.076 millóns de euros, segundo reflicte a ‘Explotación estatística da información tributaria’ publicada hoxe polo Instituto Galego de Estatística (IGE). Isto supón un incremento do 1% respecto ao 2018, pese ao descenso no ingreso do Imposto sobre Valor Engadido (IVE) polo impago de 204 millóns que aínda mantén o Goberno central. En concreto, o capítulo de impostos directos aumentou un 4,9% ata chegar aos 2.486 millóns, mentres que o capítulo de impostos indirectos reduciuse un 1,7% e situouse nos 3.401 millóns. Finalmente, o capítulo de taxas e outros ingresos mantívose estable –medrou un 1%- e ascendeu a 189 millóns. Na liña de anos anteriores, dous impostos estatais (IRPF e IVE) concentran máis do 70% do ingreso tributario de Galicia.
  • A Xunta acaba de pór en marcha unha campaña de comunicación e sensibilización para animar á cidadanía a consumir produtos agroalimentarios galegos durante a situación de emerxencia sanitaria por mor do coronavirus. A iniciativa, que foi presentada hoxe polo conselleiro do Medio Rural, José González, acompañado do director xeral de Gandaría, Agricultura e Industrias Agroalimentarias, José Balseiros, enmárcase na rede Mercaproximidade, unha canle alternativa de comercialización concibida para dar saída aos produtos afectados polo peche da hostalaría e dos mercados municipais. A campaña está dirixida aos consumidores finais, para conciencialos da calidade dos produtos agroalimentarios galegos, e para facerlles ver que coa súa compra poden contribuír á viabilidade do sector.