lunes, 13 de mayo de 2024
Primeira doazón
A Axencia de Doazón de Órganos e Sangue lembra a importancia que ten o desenvolvemento das campañas de doazón no eido da educación, tanto en centros educativos non universitarios como universitarios, xa que, para moitos rapaces e rapazas, é o primeiro contacto que teñen co solidario xesto da doazón de sangue.
Doazón de medula ósea
Esta iniciativa, que se prolongará ata o vindeiro mes de abril, é posible grazas á colaboración que brindan os reitores das tres universidades, así como os decanos e directores de todos os centros educativos, membros da comunidade universitaria (PAS, alumnos e alumnas...)
Nas xornadas previas ao desenvolvemento de cada campaña, impartiranse charlas didácticas e distribuirase material informativo cos requisitos precisos para doar, e a data e lugares onde poder participar.
Ademais, ao longo desta segunda fase vaise a levar a cabo unha intensa campaña de información, sensibilización e de captación de doantes de proxenitores hematopoéticos, tamén coñecidos como medula ósea, en centros docentes universitarios e non universitarios, comezando na Facultade de Enfermería da USC, en Santiago de Compostela.
ADOS reitera o agradecemento a todos os membros da comunidade universitaria pola súa colaboración, ao tempo que tamén agradece o seu compromiso co labor educativo e de sensibilización que se levan a cabo nas universidades. Neste sentido, lembrar que a Axencia de Doazón de Órganos e Sangue colabora coas universidades noutras iniciativas, como a realización de visitas formativas por parte dos centros universitarios ata os laboratorios de ADOS, colaboración con distintos colectivos e asociacións universitarias, ou a realización de proxectos de aprendizaxe e servizo levados a cabo con distintas facultades.
Tivo lugar unha xornada de debate organizada pola Fundación Galicia Europa (FGE) no marco da celebración do Día de Europa co obxectivo de abordar coa mocidade universitaria o estado actual do proxecto de construción europea. No evento colaboraron a asociación xuvenil Equipo Europa e a asociación de debate universitario Retórica da Universidade de Vigo. No evento tratouse o impacto da Unión Europea e das eleccións ao Parlamento Europeo do próximo xuño. A fundación ten en marcha unha campaña en redes sociais para informar á cidadanía galega sobre o traballo das institucións da UE e sobre o seu impacto en Galicia. En liña co seu compromiso con achegar a Unión á xuventude, patente na iniciativa EuroXuventude, a campaña estará principalmente destinada á mocidade.
A Cidade da Cultura de Galicia reivindica na exposición 'Outras historias posibles' a obra de seis artistas contemporáneas vinculadas a Galicia que despuntaron nos anos 80 do pasado século. A mostra, que abrirá a súas portas no Museo Centro Gaiás da Cidade da Cultura a finais deste mes de maio, reúne unha ampla escolma dos traballos de Ana García Pan, Emilia Guimeráns, Anne Heyvaert, Tusi Sandoval, Blanca Silva e Laura Terré co obxectivo de celebrar o seu talento e contextualizar a súa obra, atendendo tanto ás influencias do contexto histórico como aos eventos da vida privada que determinaron o seu devir artístico.
