lunes, 13 de mayo de 2024
A Xunta de Galicia apoia a Pistacatro, recente Premio da Cultura Galega en artes escénicas, na organización da oitava edición de D10! Encontro para a formación e innovación no circo, que se desenvolve en Santiago de Compostela ata o vindeiro 7 de decembro arredor dun programa que combina laboratorios de investigación e creación coa exhibición de espectáculos e coloquios.
O director da Axencia Galega das Industrias Culturais, Jacobo Sutil, e o director do Centro Dramático Galego, Fran Núñez, acompañaron a organización do evento na presentación que tivo lugar este mediodía no Salón Teatro, espazo onde esta mesma tarde terá lugar a primeira das seis propostas de artes circenses das que o público galego poderá gozar ata o domingo 3.
Éxitos internacionais
O representante da Consellería de Cultura, Educación, FP e Universidades comezou a súa intervención gabando o papel de Pistacatro na dinamización desta disciplina na nosa Comunidade, como colectivo que aglutina toda unha serie de alianzas e de complicidades que está a situar as artes circenses galegas no máis alto do panorama estatal e mesmo internacional, continuou. Neste sentido, subliñou éxitos fóra das nosas fronteiras como o que acadou con Orquestra de malabares o pasado mes de outubro nos festivais colombianos de Manizales e de Medellín, nos que Pistacatro participou como parte da delegación escénica galega a este país impulsada e coordinada pola Xunta.
O encontro D10!, que apoiamos practicamente desde a súa primeira edición, revélase como o complemento ideal para seguir marcando a pauta do circo desde Galicia, para compartir todo o acadado e para abrir vieiros de futuro nun oficio que cada vez está a cobrar maior e máis xustificado protagonismo dentro das artes escénicas en xeral, continuou.
Entradas xa á venda
O programa de espectáculos, para o que as entradas están dispoñibles a través dos sistemas de venda habituais de cada espazo, arranca ás 20,00 h. desta tarde no Salón Teatro con Nonsense #Cabaret de pensamento, unha proposta que conxuga os números circenses do Colectivo Verticalia coa conversa para a reflexión que manterán o filósofo Xavier Bassas, a creadora galega AveLina Pérez e a monxa budista Tenzing Ngeyung.
A sede do Centro Dramático Galego acollerá outras tres propostas escénicas: Runa, do artista sirio-catalán Amer Kabbani, mañá mércores; Rollercoaster, do recoñecido malabarista estadounidense Wes Peden, o xoves 30, e Nus, da catalá Cèlia Marcé, o venres 1 de decembro. Ao día seguinte, o Teatro Principal recibirá a tamén catalá Cía. Pepa Plana, Premio Nacional de Circo 2022, con Veus que no veus, mentres que desde a Comunidade Valenciana chegará o domingo 3 ao Auditorio de Galicia La Fam Produccions con Ambulants. Todas estas actuacións terán lugar ás 20,30 h., agás a do domingo, programada para as 18,30 h.
Ao tempo, profesionais das artes escénicas galegas están a participar desde a semana pasada nos diferentes laboratorios que acolle a Cidade da Cultura de Galicia. Da man de prestixiosos nomes do circo contemporáneo internacional, a actividade formativa deu comezo cun obradoiro centrado na internacionalización e a cooperación transnacional con Nicanor de Elia e os integrantes do espazo creativo La Grainierie, procedentes de Francia.
Os artistas alemáns Vivian Friedrich e Stefan Sing serán os encargados de conducir os outros dous laboratorios incluídos no apartado formativo, dentro do que o día 29 se organiza unha charla didáctica con Wes Peden.
D10! Encontro para a formación e innovación no circo propiciará tamén un espazo para o debate a través dos coloquios do seu Circocafé baixo os títulos É determinante a idade para dedicarse ao circo?, Xerando desde a igualdade e Como facer un circo máis sostible.
Tivo lugar unha xornada de debate organizada pola Fundación Galicia Europa (FGE) no marco da celebración do Día de Europa co obxectivo de abordar coa mocidade universitaria o estado actual do proxecto de construción europea. No evento colaboraron a asociación xuvenil Equipo Europa e a asociación de debate universitario Retórica da Universidade de Vigo. No evento tratouse o impacto da Unión Europea e das eleccións ao Parlamento Europeo do próximo xuño. A fundación ten en marcha unha campaña en redes sociais para informar á cidadanía galega sobre o traballo das institucións da UE e sobre o seu impacto en Galicia. En liña co seu compromiso con achegar a Unión á xuventude, patente na iniciativa EuroXuventude, a campaña estará principalmente destinada á mocidade.
A Cidade da Cultura de Galicia reivindica na exposición 'Outras historias posibles' a obra de seis artistas contemporáneas vinculadas a Galicia que despuntaron nos anos 80 do pasado século. A mostra, que abrirá a súas portas no Museo Centro Gaiás da Cidade da Cultura a finais deste mes de maio, reúne unha ampla escolma dos traballos de Ana García Pan, Emilia Guimeráns, Anne Heyvaert, Tusi Sandoval, Blanca Silva e Laura Terré co obxectivo de celebrar o seu talento e contextualizar a súa obra, atendendo tanto ás influencias do contexto histórico como aos eventos da vida privada que determinaron o seu devir artístico.
