lunes, 13 de mayo de 2024
O secretario xeral de Industria, Nicolás Vázquez, participou nas reunións dos comités executivos de capacidades industriais, por unha parte, e de proxectos tractores e infraestruturas, por outra, dependentes da Alianza Industrial Galega do Hidróxeno Verde para avanzar nos traballos que teñen que ver co desenvolvemento desta enerxía na Comunidade.
Deste xeito, o comité encargado da área de capacidades industriais acordou promover un mapa que incluirá as instalacións que forman parte da cadea de valor do hidróxeno verde (produción, transporte, consumo e almacenaxe), así como un catálogo de subministradores, capacidades TIC e tecnolóxicas. Neste sentido, estase traballando na localización das zonas máis propicias para a implantación de proxectos vinculados ao hidróxeno verde.
A Alianza Industrial Galega do Hidróxeno Verde, como instrumento de colaboración público-privada promovido pola Xunta de Galicia, ten como obxectivo maximizar as posibilidades de atracción de proxectos e impulsar e consolidar un novo tecido industrial, que faga de Galicia un hub do hidróxeno renovable a nivel internacional.
Proxectos tractores
O secretario xeral tamén participou na reunión do comité exectutivo de proxectos tractores e infraestruturas do que forman parte empresas da cadea de valor como Naturgy, Reganosa, Forestal del Atlántico, Repsol Ence ou Enagás, as tras autoridades portuarias da Coruña, Ferrol e Vigo e a propia Xunta.
Neste encontro valoráronse os avances dos últimos meses e púxose de manifesto a necesidade de contar cun inventario actualizado de infraestruturas de produción, transporte e distribución do hidróxeno renovable.
Tivo lugar unha xornada de debate organizada pola Fundación Galicia Europa (FGE) no marco da celebración do Día de Europa co obxectivo de abordar coa mocidade universitaria o estado actual do proxecto de construción europea. No evento colaboraron a asociación xuvenil Equipo Europa e a asociación de debate universitario Retórica da Universidade de Vigo. No evento tratouse o impacto da Unión Europea e das eleccións ao Parlamento Europeo do próximo xuño. A fundación ten en marcha unha campaña en redes sociais para informar á cidadanía galega sobre o traballo das institucións da UE e sobre o seu impacto en Galicia. En liña co seu compromiso con achegar a Unión á xuventude, patente na iniciativa EuroXuventude, a campaña estará principalmente destinada á mocidade.
A Cidade da Cultura de Galicia reivindica na exposición 'Outras historias posibles' a obra de seis artistas contemporáneas vinculadas a Galicia que despuntaron nos anos 80 do pasado século. A mostra, que abrirá a súas portas no Museo Centro Gaiás da Cidade da Cultura a finais deste mes de maio, reúne unha ampla escolma dos traballos de Ana García Pan, Emilia Guimeráns, Anne Heyvaert, Tusi Sandoval, Blanca Silva e Laura Terré co obxectivo de celebrar o seu talento e contextualizar a súa obra, atendendo tanto ás influencias do contexto histórico como aos eventos da vida privada que determinaron o seu devir artístico.
