sábado, 11 de mayo de 2024
Segundo a axenda prevista, combinaranse as reunións técnicas con visitas ao territorio. No marco das primeiras, abordaranse os principais aspectos a considerar nesta materia, a situación actual de Galicia e os instrumentos políticos relacionados, así como outros factores a ter conta á hora de reflectir adecuadamente os resultados obtidos.
En canto ás saídas previstas, cómpre subliñar unha visita ao Monte Xalo, escenario escollido pola súa condición de Área de especial interese paisaxístico e como un bo exemplo na Comunidade da combinación dos valores naturais, culturais e panorámicos.
O obxectivo deste primeiro encontro é facilitar a posterior formulación de recomendacións que permitan integrar os criterios relacionados coas infraestruturas verdes nos instrumentos galegos de protección da paisaxe, para o cal resulta especialmente interesante coñecer as experiencias previas a diferentes escalas territoriais dalgúns dos socios implicados no GIFT.
Así, nesta ocasión, contarase coa participación destacada, entre outros, de representantes da Universidade de Zagreb (Croacia), ademais da Universidade de Letonia, en calidade de socio asesor.
Tamén están convidados a participar e colaborar outros expertos e axentes con experiencia en Galicia, que poderán aportar o seu coñecemento e puntos de vista sectoriais ao equipo.
Case 2 M de orzamento
Para liderar o proxecto GIFT a Comisión Europea seleccionou á Xunta de Galicia, que delegou no Instituto de Estudos do Territorio (IET) a misión de aprender uns socios doutros para, grazas ao coñecemento adquirido entre todos, mellorar unha política propia que incorpore a infraestrutura verde a outras políticas territoriais de cada rexión.
Impulsado no marco do programa Interreg Europe-FEDER e cun orzamento de 1,97 millóns de euros o 80% procedente do Feder e o 20% restante achegado polos sociosa iniciativa porá especial énfase e atención nos bosques, nas árbores e nas paisaxes que albergan, procurando a recuperación de servizos ecosistémicos relacionados coa biodiversidade, o clima, a auga, a erosión e o benestar animal, entre outros.
O carácter innovador do GIFT reside no seu enfoque integrado coas políticas sectoriais co que se pretende abordar a infraestrutura verde fronte ao cambio climático, a súa conectividade e as medidas de recuperación da biodiversidade.
Ademais da Xunta, no proxecto participan outras nove entidades de países e rexións da Unión Europea, concretamente: o goberno rexional de Västra Götaland (Suecia), a Axencia Territorial de Flandes (Bélxica), os gobernos provinciais de Fryslân (Países Baixos) e Rimini (Italia), o Instituto Forestal Esloveno, o Centro de Apoio Empresarial de Kranj (ambos de Eslovenia), a Axencia Rexional de Leipzig (Alemaña) e os dous anteriormente mencionados: a Universidade de Letonia e a cidade de Zagreb.
Tivo lugar unha xornada de debate organizada pola Fundación Galicia Europa (FGE) no marco da celebración do Día de Europa co obxectivo de abordar coa mocidade universitaria o estado actual do proxecto de construción europea. No evento colaboraron a asociación xuvenil Equipo Europa e a asociación de debate universitario Retórica da Universidade de Vigo. No evento tratouse o impacto da Unión Europea e das eleccións ao Parlamento Europeo do próximo xuño. A fundación ten en marcha unha campaña en redes sociais para informar á cidadanía galega sobre o traballo das institucións da UE e sobre o seu impacto en Galicia. En liña co seu compromiso con achegar a Unión á xuventude, patente na iniciativa EuroXuventude, a campaña estará principalmente destinada á mocidade.
A Cidade da Cultura de Galicia reivindica na exposición 'Outras historias posibles' a obra de seis artistas contemporáneas vinculadas a Galicia que despuntaron nos anos 80 do pasado século. A mostra, que abrirá a súas portas no Museo Centro Gaiás da Cidade da Cultura a finais deste mes de maio, reúne unha ampla escolma dos traballos de Ana García Pan, Emilia Guimeráns, Anne Heyvaert, Tusi Sandoval, Blanca Silva e Laura Terré co obxectivo de celebrar o seu talento e contextualizar a súa obra, atendendo tanto ás influencias do contexto histórico como aos eventos da vida privada que determinaron o seu devir artístico.
