sábado, 11 de mayo de 2024
Ethel Vázquez lamentou que tivo que pasar un ano para que o Goberno central se autoemendase e apostase pola decisión máis sensata, que pasa pola reconstrución simultánea dos dous viadutos e polo procedemento de emerxencia.
Precisou que o propio informe encargado polo Ministerio de Transportes sinala que é necesario executar polo procedemento de emerxencia e de xeito simultáneo os viadutos de entrada e de saída para garantir a estabilidade das cimentacións, para evitar sobrecustos e para reducir o prazo de execución o máximo posible, achegando, ademais, máis seguridade viaria.
Precisou que, pese á rectificación do Ministerio, a Xunta seguirá estando vixiante ante as decisións que adopte a partir de agora, porque non se pode perder nin un minuto máis, dadas as graves consecuencias e prexuízos que a negativa do Goberno de España ata agora ten suposto para os usuarios e para os intereses da comunidade.
Incidiu en que, no mellor dos casos, aínda quedará un ano máis por diante para que os cinco carrís da A-6 volvan estar dispoñibles tras a rectificación anunciada polo Ministerio. Isto dará, como resultado final, que os usuarios sufrirán os prexuízos da situación da A-6 durante 3 anos como mínimo, tendo en conta o tempo de execución das obras, o máis dun ano que xa ten transcorrido desde o colapso do viaduto do Castro e o ano de traballos de emerxencia que se estaban executando na autovía cando se produciu o incidente.
Sinalou que estas circunstancias obrigan a afrontar, de entrada, unha campaña estival complicada nos desprazamentos de entrada e saída a Galicia por estrada, tendo en conta que a A-6 é unha das principais arterias de comunicación coa meseta; e que na outra autovía de entrada a Galicia, na A-52, se están a acometer nestes momentos obras de reparación para paliar as graves deficiencias que presenta a calzada.
A titular de Infraestruturas tamén se referiu aos atrancos, retrasos e promesas incumpridas do Goberno en relación ás infraestruturas de titularidade estatal, ante a falta de impulso das novas autovías e a inexistencia dun programa de mantemento das estradas xa existentes. Lembrou que seguen pendentes de execución autovías comprometidas como a da Mariña, a autovía Ourense-Ponferrada, a autovía Ourense-Lugo e tamén a A-54, Santiago-Lugo, que está aínda sen finalizar.
Tivo lugar unha xornada de debate organizada pola Fundación Galicia Europa (FGE) no marco da celebración do Día de Europa co obxectivo de abordar coa mocidade universitaria o estado actual do proxecto de construción europea. No evento colaboraron a asociación xuvenil Equipo Europa e a asociación de debate universitario Retórica da Universidade de Vigo. No evento tratouse o impacto da Unión Europea e das eleccións ao Parlamento Europeo do próximo xuño. A fundación ten en marcha unha campaña en redes sociais para informar á cidadanía galega sobre o traballo das institucións da UE e sobre o seu impacto en Galicia. En liña co seu compromiso con achegar a Unión á xuventude, patente na iniciativa EuroXuventude, a campaña estará principalmente destinada á mocidade.
A Cidade da Cultura de Galicia reivindica na exposición 'Outras historias posibles' a obra de seis artistas contemporáneas vinculadas a Galicia que despuntaron nos anos 80 do pasado século. A mostra, que abrirá a súas portas no Museo Centro Gaiás da Cidade da Cultura a finais deste mes de maio, reúne unha ampla escolma dos traballos de Ana García Pan, Emilia Guimeráns, Anne Heyvaert, Tusi Sandoval, Blanca Silva e Laura Terré co obxectivo de celebrar o seu talento e contextualizar a súa obra, atendendo tanto ás influencias do contexto histórico como aos eventos da vida privada que determinaron o seu devir artístico.
