Galicia demanda ao Goberno os trens AVRIL para que o AVE chegue ás cidades galegas
A Xunta insta ao Goberno a habilitar os trens AVRIL para que a alta velocidade chegue ás principais cidades galegas e a modernizar a rede ferroviaria que une A Coruña con Lugo e Ferrol. A conselleira de Infraestruturas e Mobilidade, Ethel Vázquez subliñou as actuacións recoñecidas hoxe, o AVE galego e a obra civil e mariña para a descarga de cru en Langosteira, grazas ao esforzo titánico de enxeñeiros, técnicos, directores de obra ou operarios implicados en converter en realidade estas infraestruturas.
Remarcou o traballo do sector da enxeñería, poñendo o acento nos profesionais de referencia a nivel estatal que sitúan Galicia á vangarda europea dando resposta a moitos desafíos construtivos.
No que se refire ao AVE, sinalou que é unha infraestrutura cun triplo retorno económico, social e ambiental. No primeiro ano de funcionamento, a demanda de viaxes da liña ferroviaria coa Meseta medrou máis dun 70 %, con 1,8 millóns de pasaxeiros que utilizaron o AVE para desprazarse entre Madrid e Galicia.
Neste sentido, insistiu en que se complete a chegada do AVE a Galicia, coas obras pendentes en Ourense e coa disposición dos trens AVRIL preparados para cumprir os tempos de viaxe comprometidos entre A Coruña, Santiago, Pontevedra e Vigo con Madrid.
Tamén puxo o acento na necesidade dunha planificación completa e concreta para modernizar a rede de ferrocarril que conecta A Coruña con Lugo e con Ferrol e que non pode seguir sendo unha illa ferroviaria en Galicia.
En relación ao outro proxecto recoñecido hoxe, fixo fincapé no potencial transformador da obra civil e mariña de descarga de cru no Porto Exterior de Langosteira.
Explicou que este novo pantalán para descarga de cru, con capacidade para o atraque de petroleiros de ata 200.000 toneladas e 300 metros de eslora, incrementa a súa competitividade o atractivo do Porto Exterior para a captación de novos tráficos.
Ademais, avanzou que a execución do Novo CHUAC está próxima a comezar, cun investimento de 500 M, e destaca o papel da enxeñería no impulso da maior obra sanitaria proxectada na comunidade.
Convidou aos enxeñeiros a achegarse ao proxecto que aspira a blindar a maior asistencia sanitaria pública para A Coruña e a súa área durante os vindeiros 50 anos e que en termos de mobilidade e accesibilidade representa un enorme reto.
Referiu tamén a calidade do resto dos traballos presentados a este Premio San Telmo 2021: a mellora da conexión entre Tomiño-Sabarís e a PO-344 ao paso por Seixo, impulsada pola Deputación de Pontevedra; ou a mellora e integración paisaxística das entradas dos Camiños de Santiago, en Compostela; e a pasarela na AC-552, A Grela-Marineda, presentadas pola Axencia Galega de Infraestruturas da Xunta.
R., 2023-04-27
Actualidad
Tivo lugar unha xornada de debate organizada pola Fundación Galicia Europa (FGE) no marco da celebración do Día de Europa co obxectivo de abordar coa mocidade universitaria o estado actual do proxecto de construción europea. No evento colaboraron a asociación xuvenil Equipo Europa e a asociación de debate universitario Retórica da Universidade de Vigo. No evento tratouse o impacto da Unión Europea e das eleccións ao Parlamento Europeo do próximo xuño. A fundación ten en marcha unha campaña en redes sociais para informar á cidadanía galega sobre o traballo das institucións da UE e sobre o seu impacto en Galicia. En liña co seu compromiso con achegar a Unión á xuventude, patente na iniciativa EuroXuventude, a campaña estará principalmente destinada á mocidade.
A Cidade da Cultura de Galicia reivindica na exposición 'Outras historias posibles' a obra de seis artistas contemporáneas vinculadas a Galicia que despuntaron nos anos 80 do pasado século. A mostra, que abrirá a súas portas no Museo Centro Gaiás da Cidade da Cultura a finais deste mes de maio, reúne unha ampla escolma dos traballos de Ana García Pan, Emilia Guimeráns, Anne Heyvaert, Tusi Sandoval, Blanca Silva e Laura Terré co obxectivo de celebrar o seu talento e contextualizar a súa obra, atendendo tanto ás influencias do contexto histórico como aos eventos da vida privada que determinaron o seu devir artístico.
Notas
Representantes dunha trintena de universidades españolas déronse cita en Vigo para avanzar na protección dos dereitos e no compromiso coa diversidade cultural, sexual e de xénero. Fixérono no cuarto encontro da Red de Universidades pola Diversidade, o órgano de representación das universidades españolas en diversidade sexual e de xénero (orientación sexual, diversidade corporal, afectiva, identidade de xénero e expresión de xénero) e diversidade por procedencia, cultura, crenza e afíns.
A Asociación de Escritoras e Escritores en Lingua Galega aprobou o nomeamento de Joseba Sarrionandia, escritor vasco, como Escritor Galego Universal en 2024, desde o profundo respecto e afecto á súa persoa e a valoración da altísima calidade da súa obra, así como por defender a lingua, a cultura e a dignidade nacional de Euskadi. Joseba Sarrionandía (Bizkaia, 1958), formou parte nos anos oitenta da banda literaria Pott, xunto con Bernardo Atxaga, Jon Juaristi e Ruper Ordorika.