domingo, 12 de mayo de 2024
En total serviranse uns 250.000 petiscos, con 10 elaboracións diferentes a base de produtos certificados do mar -como os amparados polo selo pescadeRías, Berberecho de Noia, Bonito do Norte ou Mexillón de Galicia- e outros produtos da terra con Indicación Xeográfica Protexida (IXP) ou Denominación de Orixe Protexida (DOP) como fabas, mel, pementos, queixos, pan ou patacas.
Esta peregrinación comezou o 15 de febreiro na praza do Obradoiro de Santiago de Compostela e visitará numerosas localidades vinculadas cos Camiños de Santiago antes de rematar en Irún, Pamplona, Sevilla e Valencia, respectivamente. Non obstante, toda a información sobre as rutas está dispoñible en https://galiciasabeamar.xunta.gal.
O obxectivo de Galicia sabe amar é dar a coñecer as numerosas opcións que ofrece a comunidade para unha alimentación sá e equilibrada, a través de produtos da máxima calidade e frescura, e tamén poñer en valor o traballo dos profesionais do sector marítimo-pesqueiro. Se en 2021 comezou a difusión principalmente entre os consumidores galegos, agora dá un paso máis para realizar un labor de promoción presencial por toda España.
Foros de debate
Entre as novidades que trae a campaña este ano tamén está a celebración de cinco foros de debate para dar a coñecer a calidade dos peixes e mariscos galegos e a enorme oferta gastronómica e hostaleira galega así como para falar dos retos de futuro do sector e buscar sinerxías entre os distintos actores.
Así, chefs e expertos na materia tratarán diversos temas relacionados cos produtos do mar e a súa cociña, a sustentabilidade da actividade, a formación e investigación, o territorio, a saúde e o benestar ou a presenza nas redes sociais.
Nestes foros participarán perfís moi diversos, desde profesionais do mar (pescadores, mariscadores ou representantes das confrarías) ata cociñeiros, investigadores, operadores turísticos, docentes e alumnos, profesionais da saúde, xornalistas gastronómicos, bloggers e representantes doutras entidades do sector marítimo-pesqueiro.
Promoción en feiras
Outro dos elementos fundamentais na promoción dos produtos do mar e na posta en valor do traballo da cadea mar-industria galega é a participación en feiras e eventos nacionais e internacionais. Dentro do primeiro semestre do ano, a Consellería do Mar participou ou participará en diversos encontros internacionais como Gulfood Dubai, Foodex Japan ou Seafood Expo North America, ou nos nacionais Aquafuture Spain de Silleda, Salón Gourmets de Madrid ou Seafood Expo Global de Barcelona.
No segundo semestre están previstas as feiras Tutto Food Milán, Expomar Burela, Salimat Abanca en Silleda, Summer Fancy Food Show de Nova York, Seafood Expo Asia, Expomar Cabo Verde, Conxemar Vigo, Anuga Colonia, San Sebastián Gastronómika, Xantar Ourense ou Gastrónoma Valencia.
Resultados
Todo o traballo realizado na promoción dos produtos do mar ten un claro impacto no seu consumo e na súa cotización. De feito o prezo medio acadado nas lonxas galegas en 2022 foi de 3,26 euros o quilo, unha cifra un 30% superior á media da serie histórica, que se remonta ao ano 2002. Deste xeito increméntanse os ingresos, a rendibilidade e a sustentabilidade do sector marítimo-pesqueiro ante un escenario incerto debido ás dificultades derivadas da guerra en Ucraína ou do encarecemento das materias primas.
Galicia conta con máis de 60 lonxas nas que se comercializan arredor de 300 especies diferentes entre peixes, mariscos, crustáceos, algas ou equinodermos, recursos da máxima calidade e demandados en todo o mundo. A eles engádense outros produtos procedentes da acuicultura (como o mexillón) ou da industria transformadora que acaban fornecendo os mercados de todo o mundo para elaborar os pratos máis innovadores e saborosos nos restaurantes máis prestixiosos.
Un sector con impacto en toda a economía
O impacto de todas estas accións de promoción non só afecta ao propio sector, senón que se transmite ao conxunto da economía galega posto que o sector marítimo-pesqueiro ten relación con 76 das 83 ramas económicas identificadas en Galicia. O complexo mar-industria galego factura anualmente arredor de 9.000 millóns de euros e o valor das exportacións está a medrar de forma continuada nos últimos anos ata superar os 2.500 millóns de euros en 2022.
A todo isto contribúen en boa medida as accións de promoción e a participación en diferentes feiras e eventos que poñen en contacto ao sector con potenciais clientes en todo o mundo, pero sobre todo é o resultado dun complexo marítimo-pesqueiro que desenvolve unha gran variedade de actividades (pesca, marisqueo, cultivos mariños, depuración e transformación dos produtos do mar...) e que conta con máis de 120 portos que xeran unha importante actividade económica e definen tanto o carácter das xentes da súa contorna como a cultura e o patrimonio de moitas localidades costeiras.
Tivo lugar unha xornada de debate organizada pola Fundación Galicia Europa (FGE) no marco da celebración do Día de Europa co obxectivo de abordar coa mocidade universitaria o estado actual do proxecto de construción europea. No evento colaboraron a asociación xuvenil Equipo Europa e a asociación de debate universitario Retórica da Universidade de Vigo. No evento tratouse o impacto da Unión Europea e das eleccións ao Parlamento Europeo do próximo xuño. A fundación ten en marcha unha campaña en redes sociais para informar á cidadanía galega sobre o traballo das institucións da UE e sobre o seu impacto en Galicia. En liña co seu compromiso con achegar a Unión á xuventude, patente na iniciativa EuroXuventude, a campaña estará principalmente destinada á mocidade.
A Cidade da Cultura de Galicia reivindica na exposición 'Outras historias posibles' a obra de seis artistas contemporáneas vinculadas a Galicia que despuntaron nos anos 80 do pasado século. A mostra, que abrirá a súas portas no Museo Centro Gaiás da Cidade da Cultura a finais deste mes de maio, reúne unha ampla escolma dos traballos de Ana García Pan, Emilia Guimeráns, Anne Heyvaert, Tusi Sandoval, Blanca Silva e Laura Terré co obxectivo de celebrar o seu talento e contextualizar a súa obra, atendendo tanto ás influencias do contexto histórico como aos eventos da vida privada que determinaron o seu devir artístico.
