domingo, 12 de mayo de 2024
O presidente da Xunta, Alfonso Rueda, enxalzou hoxe o feito de que Galicia mellorou o déficit marcado no orzamento, xa que apuntou que se situou nun 0,4 % do Produto Interior Bruto, o que supón dúas décimas menos do límite previsto. Ademais, subliñou que a comunidade rexistrou unha ratio débeda/PIB do 17,2 %, tres décimas por debaixo do previsto, o que supuxo aforrar 210 millóns de euros, en canto a capacidade de endebedamento.
O mandatario galego explicou estes datos, recollidos no informe presentado hoxe ao Consello da Xunta polo titular da Consellería de Facenda e Administración Pública, Miguel Corgos, sobre o avance do peche do exercicio 2022. Sobre o mesmo, Rueda puxo en valor que reflicte que Galicia é a comunidade autónoma que menos incrementou a débeda desde o ano 2009, segundo os datos oficiais do Banco de España.
Ademais, destacou que tamén recolle que a Administración galega continúa entre as comunidades que antes paga aos proveedores, 10 días antes que a media. En concreto, explicou que foi a segunda que aboou máis rápido os seus compromisos no ano 2022, nunha media de 14,9 días, fronte ao 25,2 do conxunto das administracións autonómicas.
Recuperación PIB prepandemia
Rueda lembrou que Galicia recuperou no cuarto trimestre de 2022 o nivel do PIB da prepandemia, con varios trimestres de antelación á media de España, cando hai comunidades que aínda non o teñen recuperado, contrapuxo. Tamén salientou o feito de que a economía galega medrou un 3,8 % o ano pasado, dúas décimas por riba do previsto, remarcou.
Finalmente, en termos de emprego, o presidente da Xunta salientou que no conxunto do ano 2022 creáronse preto de 22.000 postos de traballo equivalentes a tempo completo (PTETC), polo que aumentou un 2,2 % con respecto ao anterior exercicio, o que tamén permitiu superar o número empregos da economía galega antes da pandemia.
Tivo lugar unha xornada de debate organizada pola Fundación Galicia Europa (FGE) no marco da celebración do Día de Europa co obxectivo de abordar coa mocidade universitaria o estado actual do proxecto de construción europea. No evento colaboraron a asociación xuvenil Equipo Europa e a asociación de debate universitario Retórica da Universidade de Vigo. No evento tratouse o impacto da Unión Europea e das eleccións ao Parlamento Europeo do próximo xuño. A fundación ten en marcha unha campaña en redes sociais para informar á cidadanía galega sobre o traballo das institucións da UE e sobre o seu impacto en Galicia. En liña co seu compromiso con achegar a Unión á xuventude, patente na iniciativa EuroXuventude, a campaña estará principalmente destinada á mocidade.
A Cidade da Cultura de Galicia reivindica na exposición 'Outras historias posibles' a obra de seis artistas contemporáneas vinculadas a Galicia que despuntaron nos anos 80 do pasado século. A mostra, que abrirá a súas portas no Museo Centro Gaiás da Cidade da Cultura a finais deste mes de maio, reúne unha ampla escolma dos traballos de Ana García Pan, Emilia Guimeráns, Anne Heyvaert, Tusi Sandoval, Blanca Silva e Laura Terré co obxectivo de celebrar o seu talento e contextualizar a súa obra, atendendo tanto ás influencias do contexto histórico como aos eventos da vida privada que determinaron o seu devir artístico.
