sábado, 11 de mayo de 2024
As catro comunidades autónomas coinciden na necesidade de colaborar para despregar unha adecuada rede de infraestruturas para a subministración enerxética destinada tanto á propulsión eléctrica como ao hidróxeno e outros combustibles alternativos nas súas principais vías de conexión. Este novo equipamento atoparase interconectado e interoperable, primando o seu carácter de utilidade e comodidade para os consumidores.
En concreto, prevese o desenvolvemento dunha rede de carga rápida e ultra rápida de mobilidade eléctrica que facilite o acceso e rapidez dos procesos de recarga, garantindo unha adecuada dispoñibilidade. Tamén se potenciará unha rede de estacións de recarga de combustibles alternativos nas principais vías de conexión. Ademais, haberá unha rede de provedores de hidróxeno para os diferentes vehículos que se irá implantando a medida que avance este tipo de mobilidade atendendo, nun primeiro momento, a áreas con frotas de vehículos con gran consumo e potencial de renovación (áreas industriais, portos, transporte urbano e metropolitano...), estendéndose, posteriormente, ao resto do territorio. Agárdase que as primeiras actuacións relacionadas coas infraestruturas eléctricas e de combustibles alternativos poidan comezar no segundo semestre deste mesmo ano.
De xeito paralelo, avanzarase na busca de alianzas con outras administracións e axentes; a colaboración con centros e empresas tecnolóxicas para o fomento de proxectos de I+D+i, que impulsarán o desenvolvemento industrial asociado ao sector da mobilidade e o transporte, aproveitando o seu carácter transversal en áreas como o turismo ou a produción agraria.
Deste xeito, as medidas froito deste protocolo repercutirán nun maior aproveitamento do potencial renovable, nun mellor posicionamento e mellora da competitividade das empresas e industrias destas comunidades, así como na creación de novas oportunidades e nunha mellora da calidade de vida da cidadanía e do medio rural.
Esta iniciativa enmárcase nos obxectivos fixados na Axenda Enerxética de Galicia 2030 relativos ao eixo dedicado á mobilidade sustentable; así como na Estratexia Galega de Mobilidade, que recolle o obxectivo de transformar o actual modelo para pasar a un máis funcional, máis sustentable ambiental e economicamente e máis seguro, apoiándose para iso na innovación tecnolóxica.
eMobility Challenges 2023
Por outra banda, o director xeral de Planificación Enerxética e Recursos Naturais, Pablo Fernández Vila, participou esta mañá en Oviedo no eMobility Challenges 2023: O futuro da mobilidade no corredor atlántico,no que se referiu a este acordo e na necesidade de traballar por unha transición enerxética planificada e ordenada que avance tanto na rede de infraestruturas como no uso de combustibles alternativos de xeito progresivo.
O director xeral avanzou que Galicia incluirá unha futura modificación lexislativa que estableza que as infraestruturas de recarga eléctrica e de hidróxeno de vehículos, así como as extensións ou reforzos necesarios na rede de distribución gozarán de prioridade na tramitación administrativa autonómica e redución de prazos á metade. Deste xeito, Galicia asume un claro compromiso co desenvolvemento da mobilidade sustentable.
Tivo lugar unha xornada de debate organizada pola Fundación Galicia Europa (FGE) no marco da celebración do Día de Europa co obxectivo de abordar coa mocidade universitaria o estado actual do proxecto de construción europea. No evento colaboraron a asociación xuvenil Equipo Europa e a asociación de debate universitario Retórica da Universidade de Vigo. No evento tratouse o impacto da Unión Europea e das eleccións ao Parlamento Europeo do próximo xuño. A fundación ten en marcha unha campaña en redes sociais para informar á cidadanía galega sobre o traballo das institucións da UE e sobre o seu impacto en Galicia. En liña co seu compromiso con achegar a Unión á xuventude, patente na iniciativa EuroXuventude, a campaña estará principalmente destinada á mocidade.
A Cidade da Cultura de Galicia reivindica na exposición 'Outras historias posibles' a obra de seis artistas contemporáneas vinculadas a Galicia que despuntaron nos anos 80 do pasado século. A mostra, que abrirá a súas portas no Museo Centro Gaiás da Cidade da Cultura a finais deste mes de maio, reúne unha ampla escolma dos traballos de Ana García Pan, Emilia Guimeráns, Anne Heyvaert, Tusi Sandoval, Blanca Silva e Laura Terré co obxectivo de celebrar o seu talento e contextualizar a súa obra, atendendo tanto ás influencias do contexto histórico como aos eventos da vida privada que determinaron o seu devir artístico.
