sábado, 11 de mayo de 2024
Este é unha das iniciativas impulsadas no marco da estadía de investigación que realiza na facultade pontevedresa este investigador da Escola de Artes, Ciencias e Humanidades da USP, que este martes impartía unha conferencia sobre os principais retos aos que ten que facer fronte a xestión pública no Brasil.
Como explicou o decano de Dirección e Xestión Pública, Enrique Varela, estas actividades insírense na colaboración da facultade cunha das universidades máis importantes de América Latina. Os investigadores da UVigo e da USP traballan no desenvolvemento dun modelo de análise comparada, entre os sistemas administrativos destes dous países, que teñen unha realidade parecida, pero entre os que tamén hai moitas diferencias. Este modelo permitirá, como explica Varela, determinar como se xestiona, que políticas se levan a cabo ou como desenvolver novas liñas de innovación. A idea, sinalou o decano e coordinador do Observatorio da Gobernanza, é desenvolver unha ferramenta que permita facer análises comúns de problemas que poden ser tamén comúns, na xestión dos servizos ou no desenvolvemento de políticas públicas, de tal xeito que constitúa un marco co que analizar políticas e coñecer as solucións que se lle deron en sistemas públicos parecidos. Concretamente, Coelho puxo o foco no interese deste modelo de análise para realizar un estudo comparativo de como está organizado o poder local e a xestión municipal nos dous países. Ao mesmo tempo, outro dos propósitos desta colaboración é realizar unha análise comparada dos estudos de administración e xestión pública en Brasil e en España, como engadiu Varela.
Retos nun contexto de polarización
Nesta xornada, Coelho impartiu unha conferencia sobre as perspectivas da xestión pública brasileira na contemporaneidade, na que afondou nos tres principais retos aos que debe enfrontarse o sistema público dun país marcado nos últimos anos pola polarización política. O investigador da USP referiuse en primeiro termo á necesidade de aumentar a capacidade administrativa das entidades locais, posto que no Brasil existen 5570 municipios, o 90% de menos de 20.000 habitantes e que moitas veces non teñen recursos nin persoal para a implantación de políticas. A isto súmase á súa vez o reto de mellorar a dimensión dos servizos públicos, como a educación e a sanidade, aos que unha parte da poboación non ten acceso, unha problemática que se viu agravada pola pandemia, recoñeceu. Finalmente, o terceiro reto é o que define como desperdicio pasivo, a mala utilización dos recursos públicos en accións, como por exemplo, realizar construcións ou compras públicas que logo non teñen utilidade. Nos últimos 15 anos tivemos un moi bo sistema de loita contra a corrupción, pero non temos un sistema de verificación da calidade do gasto público, sostivo Coelho, que explicou que este desperdicio representa case o dobre de gasto público do que poida supor a corrupción.
Este conxunto de problemáticas víronse agravadas á súa vez polo contexto político e económico vivido nos últimos anos no Brasil, marcado tanto por unha crise económica, como por un panorama de polarización política, dentro do que, lembrou Coelho, tivemos unha recente tentativa de golpe de estado. Agora mesmo, a democracia no Brasil está moi débil, engadiu o investigador, para quen este contexto viuse agravado por un estancamento dos investimentos na xestión pública durante o goberno de Jair Bolsonaro, que traballou soamente os grandes retos da economía, pero non os problemas da xestión pública e as políticas sociais.
Reactivar a colaboración
Alén do traballo investigador que desenvolven nestas semanas, a estadía de Coelho no Observatorio da Gobernanza enmárcase no proceso de internacionalización da facultade, como sinala Varela, xa que outro dos seus propósitos é potenciar a colaboración cunha das universidades máis importantes de América Latina. Nese senso, ambos traballan na actualización do convenio de recoñecemento mutuo de estudos que a UVigo e a USP asinaron en 2011 e que permite que estudantes de Dirección e Xestión Pública e alumnado de Xestión de Políticas Públicas en Sao Paulo poidan obter as dúas titulacións cursando parte dos seus estudos na outra universidade. Este convenio, lembrou Varela, fixo posible de case 50 estudantes brasileiros se formasen no campus pontevedrés, mais o cambio do plan de estudos do grao obriga a renovar ou adaptar este convenio.
Así mesmo, Coelho traballa tamén coa facultade na organización dun módulo internacional para un curso de especialización da USP, uns estudos de posgrao sobre xestión pública para profesionais, coa idea de que poidan desenvolver na UVigo unha estadía que lles permita afondar en cuestións como a organización política e administrativa en España e Galicia, os retos da xestión pública profesional ou exemplos de boas prácticas neste eido, explicou, a través dunha serie de conferencias e seminarios.
Tivo lugar unha xornada de debate organizada pola Fundación Galicia Europa (FGE) no marco da celebración do Día de Europa co obxectivo de abordar coa mocidade universitaria o estado actual do proxecto de construción europea. No evento colaboraron a asociación xuvenil Equipo Europa e a asociación de debate universitario Retórica da Universidade de Vigo. No evento tratouse o impacto da Unión Europea e das eleccións ao Parlamento Europeo do próximo xuño. A fundación ten en marcha unha campaña en redes sociais para informar á cidadanía galega sobre o traballo das institucións da UE e sobre o seu impacto en Galicia. En liña co seu compromiso con achegar a Unión á xuventude, patente na iniciativa EuroXuventude, a campaña estará principalmente destinada á mocidade.
A Cidade da Cultura de Galicia reivindica na exposición 'Outras historias posibles' a obra de seis artistas contemporáneas vinculadas a Galicia que despuntaron nos anos 80 do pasado século. A mostra, que abrirá a súas portas no Museo Centro Gaiás da Cidade da Cultura a finais deste mes de maio, reúne unha ampla escolma dos traballos de Ana García Pan, Emilia Guimeráns, Anne Heyvaert, Tusi Sandoval, Blanca Silva e Laura Terré co obxectivo de celebrar o seu talento e contextualizar a súa obra, atendendo tanto ás influencias do contexto histórico como aos eventos da vida privada que determinaron o seu devir artístico.
