lunes, 20 de mayo de 2024
O presidente da Xunta, Alfonso Rueda, salientou hoxe que o Goberno galego ten mobilizados o 100 % dos 1.122 millóns de euros recibidos ata o de agora dos fondo europeos do Mecanismo de Recuperación e Resiliencia (MRR). No entanto, advertiu de que a Galicia fáltanlle aínda 144 millóns dos 1.266 millóns de euros que ten asignados. Porque asignar non quere dicir recibir, apuntou a este respecto, ao tempo que lamentou que o 40 por cento do achegado á comunidade foi nos últimos seis meses.
En todo caso, puxo en valor que a pesar destes retrasos sen moita razón e das dificultades Galicia cumpriu cun nivel de execución moi notable dos fondos do Mecanismo de Recuperación e Resiliencia recibidos. Así, apuntou a que dúas terceiras partes destes 1.122 millóns -747 M- xa teñen publicadas a súa convocatoria, e a metade destes millóns xa chegaron aos seus destinatarios, engadiu.
O mandatario galego explicou que, na práctica, isto se traduce en que a Xunta xa está dando apoios grazas a estes fondos que están perfectamente identificados. En concreto, precisou que foron dirixidos a 7.000 persoas autonómas, 370 empresas, 12 entidades do sector público, máis de 27.000 persoas físicas e 130 organismos públicos, entre clústeres e asociacións.
Rueda fixo fincapé no feito de que, dos fondos europeos orzamentados pola Xunta de Galicia destinados a entidades locais, o 93 por cento -60 millóns de euros- xa foron executados, unha porcentaxe que contrapuxo coa partida recibida polos municipios directamente do Goberno central, e que situou nun 46,2 %, menos da metade da execución da Xunta, remarcou.
Demanda da mesma axilidade ao Goberno central
Estes datos amosan -segundo subliñou o presidente galego- que o Goberno galego segue sendo áxil. E isto dános dereito a pedir a mesma axilidade, en referencia aos fondos europeos e que defendeu que o Goberno central ten que pór á disposición dos proxectos tractores galegos. Neste senso, denunciou que, ata agora, Galicia só recibiu o 3,5 % da axuda comprometida nos PERTE.
No caso de Galicia, trátase de proxectos vitais para o seu futuro económico e laboral, como son a plataforma para a fabricación dos novos modelos do vehículo eléctrico de Stellantis en Vigo; factoría de grafito -tamén para vehículos eléctricos- que Resonac (antiga Showa Denko) pretende situar na Coruña; a fábrica de fibras téxtiles que Altri propón construír en Palas de Rei (Lugo); ou a futura planta de pneumáticos de Sentury Tire no municipio coruñés das Pontes.
Por estes motivos, considerou especialmente oportuno que coincidise o informe sobre a execución do Mecanismo de Recuperación e Resiliencia presentado hoxe ao Consello da Xunta coa visita da comisión do Parlamento europeo para examinar a xestión destes fondos. Agardo cambios e que se axilicen, defendeu en referencia a trámites farragosos e excesivamente burocráticos, ao tempo que insistiu na necesidade de descentralización para que estes recursos cheguen canto antes. Aínda estamos a tempo, pero cada vez queda menos, advertiu.
Os apoios, que poden chegar aos 3 millóns de euros por proxecto, son de ata o 45% do investimento subvencionable no caso dos proxectos de grandes empresas, mentres que no caso das pemes serán do 45% ou do 55% en función da porcentaxe de redución de emisións xustificada. Con estas axudas que xestiona o Instituto Enerxético de Galicia (Inega) búscase incentivar a transformación ecolóxica da actividade industrial de cara a unha economía baixa en carbono e a súa competitividade nun mercado global, diminuíndo o consumo de enerxía e promovendo a introdución da mellor tecnoloxía dispoñible. Ao mesmo tempo, estas axudas que se enmarcan na Estratexia Galega de Cambio Climático e Enerxía 2050 e na Axenda Enerxética de Galicia 2030 contribúen a reactivar e dinamizar a economía da provincia tras o peche das centrais térmicas.
A directora da Axencia Galega de Doazón de Sangue, Órganos e Tecidos, ADOS, Marisa López, salientou que o pasado ano se rexistraron en Galicia 103.525 doazóns de sangue, das que 9.564 se corresponden a persoas que doaron por primeira vez. Estes bos resultados, que foron expostos pola directora na Comisión 5ª de Sanidade do Parlamento de Galicia, sitúan Galicia entre as comunidades máis solidarias. Este número de doazóns permitiu dar resposta e garantir o abastecemento de hemoderivados de todos os centros hospitalarios de Galicia, en todo momento, e de xeito ininterrompido.
